IA-avtalen

IA-avtalen blei 2. november 2022 forlenga ut 2024.

Avtalen gjeld alle verksemder i norsk arbeidsliv. Digitaliserings- og forvaltningsdepartementet er part i avtalen, og representerer arbeidsgjevarane i det statlege tariffområdet.

PM-2018-28 i Statens personalhandbok gir føringane i det statlege tariffområdet.

I juni 2023 fekk statlege verksemder moglegheit til å lage frivillige, lokale IA-avtaler. Meir om bakgrunnen for dette:

No kan du lage ein lokal IA-avtale i verksemda

Målet for avtalen er å leggje til rette for at så mange som mogleg kan arbeide så mykje som mogleg, så lenge som mogleg.

Overordna inneheld avtalen konkrete mål knytt til sjukefråver og fråfall frå arbeidslivet.

Satsingsområda i IA-avtalen

Sterk satsing på førebyggande arbeidsmiljøarbeid, målretta tiltak mot einskilde bransjer, kompetansetiltak og utvida eigenmelding er blant tiltaka i IA-avtalen.

IA-avtalen har to overordna mål

• Sjukefråveret skal reduserast med 10 prosent samanlikna med årsgjennomsnittet for 2018.
• Fråfallet skal reduserast.

For å oppnå måla i IA-avtalen, har ein gjort desse tiltaka:

• Arbeidslivssenter: Arbeidslivssentra skal vere verkemiddel for alle. Verksemdene får behalde kontaktpersonen sin på NAV Arbeidslivssenter fram til dei blir erstatta av nye digitale løysingar.
• Tilskot til ekspertbistand: Det er etablert eit tilskot til ekspertbistand. Dette blir forvalta av NAV Arbeidslivssenter (ALS). Tilskota skal vere til ekspert­bistand i einskilde saker med lange og/eller ofte gjentakande sjukefråvær. Tilskotet blir avgrensa til situasjonar der dokumenterte bedriftsinterne tiltak og andre offentlege støtteordningar har vore utprøvde. Arbeidsgjevar, NAV Arbeidslivssenter og den einskilde arbeidstakar må vere samde om at det er formålstenleg med ekstern ekspertbistand for å finne løysingar.
• Målretta innsats: Innsatsen blir målretta mot bransjar og sektorar som har potensial for redusert sjukefråvær. Det er sett eigne mål for prioriterte bransjar fordi avtalen erkjenner at det er ulikskapar i bransjar i det norske arbeidslivet
• Førebyggande arbeidsmiljøarbeid: Førebyggings- og tilretteleggingstilskottet, som har lege i tidlegare IA-avtaler, er fjerna. Dei årlege midla til tilskottet er fordelt på verkemidla i avtalen. Det blir mellom anna oppretta ein ny nettportal under Arbeidstilsynet som skal rette seg mot dei ulike bransjane og utfordringane som er unike for kvar bransje
• Kompetansetiltak: Utfordringa er gjentakande, ofte langvarige sjukefråvær.  I dei tilfella ein på eit tidlegare tidspunkt veit at personen ikkje kan koma tilbake i same jobb, skal det setjast i gang kompetansetiltak, og heller satsast på omskolering og etterutdanning.
• Utvida eigenmelding: Automatikken i at arbeidstakarar i tidlegare IA-bedrifter har hatt utvida eigenmelding fall bort i den gjeldande avtalen. Dåverande Kommunal- og moderniseringsdepartementet anbefalte alle statlege verksemder å ta i bruk ordninga med utvida eigenmelding etter drøfting med dei tillitsvalde. Dette er gjennomført hjå dei fleste. Rett til utvida eigenmelding blir sett som eit av tiltaka i det systematiske arbeidet med sjukefråvær.